من أجل دموع أمي سأحضرمبارايات المنتجب في المنزل

السلام عليكم

بدون مقدمات خسرنا وبغض النظر عن العذر بس ماني عرفان من لعبة اليوم شو طلعنا بنتائج يا جماعة فهموني

خسرنا ........ولا ما خسرنا !!!

هادا لعبنا ..............ولا مو لعبنا !!!

هادا منتخبنا ............ولا مو منتخبنا !!!

إستفدنا ...........ولا ما إستدفنا !!!

إنكشفنا .........ولا ما إنكشفنا !!!

نتفائل ........ ولا ما نتفائل !!!

فهموني والله مو عرفان من وين بدي بلش لك أول مرة بحضر مباراة ما بعرف إطلع بعذر حتى لو كان على الصعيد الشخصي حتى لو كنت عم واسي حالي مو مشكلة

المهم نام وأنا عم قول ناويين على راسك يا آسيا وفيق الصبح وقول باقي خمس تيام لنبلش كسح بكل فريق متكبر .... بس يا خسارة اليوم كل حساباتي تكركبت

بس أهم النتائج يلي طلعت فيها اليوم هوي مشاهدة المبارة خارج المنزل حتما ... لأنو كل شي توقعتو إلا إني شوف دموع أمي على كرة قدم !!!!!

كانت تقلي يا ماما لوين رايح لك اليوم جمعة عود بالبيت لنشوفك قلها نازل عل الملعب ما بطول ( تقلي روح الله يكبر عقلك )

بس أنا حطيت سبب الدموع على الحملة ......ولا ليش شو دخل الحملة !!!!

كل الحق على الوطنية الزايدة .....ولا ليش وشو دخل الوطنية بالنص

كل الحق على لطفي هوي يلي بكى الوالدة اليوم ولا شو دخل لطفي الزلمة سوري ووطني متلنا وعم يعمل يلي عليه ( بس يمكن جرعات التفاؤل كانت زايدة شوي )

قسما بالله بعد الهدف الثاني صارت الوالدة تبكي علما أمي ما بتعرف منتخبنا مع مين عم يلعب !!! قربت عليها وصرت إحلفلها يمين إنو مباراة ودية

وصارت تقلي كذاب هاي المباراة يلي كان عم يحكي عليها لطفي صرلو شهر وانا عم بدعيلهن وبالآخر هييييييييك !!!

وأرجع إحلفلها وما تصدق .... قلتلها لك لنفترض مباراة رسمية بتبكي هيك ؟؟؟ لك هاي يا ماما كرة قدم بس عبث وتمت على وضعها لحتى فرجيتها حلقة الكرة بملعبك من جديد وصدقتني طبعا الحق علي أنا السبب

وبعد ما سمعت غنية وفيق حبيب قالتلي ماما إيمتى مباراة السعودية ( دبروها إذا بتدبر )

وقررت أحضر مباراة السعودية وسوريا خارج البيت كرمالها

ما بعرف شردت شوي بااللاعبين قلت ياترى هنن شاعرين بهاي المسؤولية والغيرة يلي نحنا شاعرين فيها ؟؟

ما بقدر قول إلا أكيد إي شاعرين

نحنا السورين حماسيين ومتفائلين زيادة على اللزوم طبعا هادا حقنا بس يا ترى اللاعبين متلنا ؟؟ ... أكيد متلنا

وطبعا بإذن الله مباراة البطولة غير ولح يكون منتخبنا غير بإذن واحد أحد وأملنا بالله كبير

لازم نكون متفائلين بواقعية لأنو بعد أداء اليوم أكيد الحذر حاوطني من الأطراف الأربعة وأولها حضور المباراة خارج البيت

نحنا مع الإعلام ومع كل شي بيوصلنا للنصر والفرح بس كمان بنفس الوقت صار لازم ما نفرط بتفاؤلنا لحتى ما ننصدم لا سمح الله

أنا يا شباب لح تم قوول ودية لرب العالمين يفرجها .. إي نعم ودية في عنا غير هالحكي ؟؟ أكيد مافي وما طلعت بغير هالعذر

كنت بدي إحكي شوي بلاعبين المنتخب قلت لحالي مو وقتها خلي كل الحكي بالقلب ولبعد البطولة لكل حادث حديث هلأ مو وقتها كل العالم ما عم ترضى تحكي بالفنيات ولح كون واحد منهن

بس بالمجمل مو هادا الوعد يلي انوعدنا فيه من لاعبينا !

كرمال الله يا منتخبنا يوم الأحد لعبوا

سجلوني أنا متفائل مو كرمال المنتخب هاالمرة لأ ..... كرمال ما يروحوا دموع الوالدة عل الفاضي بإذن الله

هادا منتخبنا ............ولا مو منتخبنا !!!